拍廣告其實唔難

自序
   
　　眨下眼，我由畢業入行到依家，啱啱二十年。
 
　　二十年間，我由一個乳臭未乾嘅細路到成家立室，成為兩位小朋友嘅爸爸；由一個乜都唔識嘅新鮮人製作助理（即係PA），然後慢慢喺唔同崗位上學習，到成為廣告導演；亦由喺一間二十幾人嘅公司工作，到自己成立一人公司，再同幾位朋友組成稍具規模嘅製作公司。

　　咁多年嚟，見證住廣告製作由動輒幾百萬上落到依家幾萬蚊都有找；從前行家放飯食自助餐，到依家買飯都唔敢買咁貴；甚至乎每次出call 幾十人到依家幾個人就去拍嘢。經歷過行業興衰，同時亦見證住自己嘅成長。
 
　　五年前難得公司／屋企批准我放一個 Gap Year，喺嗰段時間得到香港賽馬會邀請，去為16-21 歲嘅年青人分享生涯規劃。過程中發現年青人對廣告製作都充滿好奇，這令我忽發奇想，不如成立一個 facebook 專頁去同年青人分享廣告製作呢門專業！之後，「拍廣告其實唔難」就應運而生。
 
　　呢個命名其實有幾重意思：拍廣告難唔難？見仁見智！但近年客戶經常有一句口頭禪：「呢條片好簡單，我用手機都拍到。」如果大家熟悉網絡文化，就會知道「其實唔難」出自高登，係人自吹自擂嘅口頭禪，帶諷刺意味；相反，廣告製作對於一啲資深製作人嚟講，即使唔算容易，但係只要每個作品都用心去做，其實都唔會太難！而佢地能夠輕易駕馭不同複雜程度storyboard 嘅最大原因，就係佢哋重視每一次製作。由做拍攝前嘅準備、做test、拍攝時一絲不苟等等，令到香港廣告曾經不斷登上國際廣告獎項嘅舞台。
 
　　本書分咗幾個部分，一開始先同大家講下唔同崗位嘅劃分；然後再細數我呢二十年經歷過嘅血淚史（「血與汗」、「笑與淚」同「工作史」）；最後就係一啲關於廣告製作時用到嘅特別工具，其中部分已經被時代所淘汰，卻係陪伴住我成長，對我本人別具意義。
 
　　喺度亦特別鳴謝三位為本書寫序嘅前輩同朋友：阿佛除咗係一名資深嘅廣告導演，亦係我舊老闆，以至係我喺廣告製作方面嘅啓蒙老師（即係師傅）；當年唔係佢請咗我同教我咁多嘢嘅話，亦冇今日嘅我。Rudi 寫嘅《廣告風涼話》，我由yahoo blog年代就開始追睇，當時已經封佢做偶像，估唔到近年竟有機會合作，仲畀到我喺工作上有唔同嘅突破。做廣告製作，只有製作公司同Agency 其實唔夠，最重要係有客戶畀錢，而阿Belle 除咗係大學師妹外，雖然佢已經離開廣告界，但當年亦喺客戶嘅角度，畀到好多參考我。
 
　　希望大家喺呢本書除咗睇到我嘅「廣告製作血淚史」，亦可以體會到廣告製作嘅樂趣。無論拍廣告難唔難，拍廣告其實好好玩！