蓮花化心

　　我聽著房間內有島嶼天光的歌聲嚴肅宏響，閣看著日頭光慢慢仔跁起來玉山的頂懸，照著島嶼西部平原台灣海峽，嘛照過花蓮台東太平洋，閣照去和平島佮上南爿的鵝鸞鼻。

　　毋是一世人攏讀中國人的册，希望台灣人有家己的册通讀。

　　《蓮花化心》這篇小說借用宗教神話「哪吒蓮花化身」佮荷馬史詩「胡得時(Odyssey)回鄉歷程」的經典意象，將典故進一步深化做台灣人追求心靈改造的「蓮花化心」。故事是女主角林玉真由懵懂到覺醒的一段身心同時經受著的淬煉，聽好講是象徵台灣人重新釘根台灣的「胡得時」（中譯「奧德賽」），伊親像胡得時欲倒轉去伊的故鄉，經歷重重疊疊的関卡，有悲傷、有哀怨；有眠夢、有期待；有憤慨、有叫喝；有心悶、有蜜甜。過程假若蛇佇褪殼，伊一步一步，認知去除漢化(De-Sinifying)，完成蓮花化心，會當承先啓後，向望出日。

本書特色

　　★火金姑台語文學基金贊助出版⑧
　　★海外台語文學創作先聲──崔根源全新著作
 

作者簡介

崔根源

　　本名吳金德，1938年佇高雄茄萣出世。台灣大學法律系畢業，美國北達科大州大學J.D.，北達科大州律師公會會員。經商，定居美國加州，1996年退休。1997年開始創作台語小說，2000年創設海翁台語文學獎、2008年設火金姑台語文學基金。著作有短篇小說集《水薸仔的夢》、《人狗之間》，長篇小說《倒頭烏佮紅鹹鰱》、《無根樹》、《回顧展》、《超渡》，中篇小說《蓮花化心》。

§活甲真有尊嚴

我一直無閣收著阿兄的批，讀怹遊行的報導，有看著一小段：

「遊行中，有一个精神失常的少年人，踮總統府的頭前自焚身亡，經查證，少年人名做林信理。」

我搦(lat)絯報紙，目睭即時烏暗去，若雨水的目屎直直流，親像摔落去萬丈深坑，大聲叫喝，信理！信理！

聽無伊親切的男高音，攏是我心內，陳袂煞，怨傷的脆(tshè)雷，
我閣大聲喊喝，報導的記者，恁的良心佇佗位？恁的良心揹踮跤脊骿？

隔工，我去共于主任請三工假，講我厝裡臨時有代誌愛趕轉去台南，于主任親像知影我的心事。

「玉真！妳若欲停較久，事後補假道好。」

到厝，章伯仔章姆仔做伙徛踮門口，我攬絯章姆仔，大聲哮，章姆仔細細聲仔：

「阿真，哮予夠喟，共妳悲慘的身世哮哮予出來。」

過有一時仔，章姆仔牽我入去厝內。

「恁章伯仔有倩人運信理的遺體轉去泰源。」

我攑頭，細聲共章姆仔章伯仔說謝。

「阿真！」章伯仔踏倚我的身邊，親像我細漢時接接聽著，伊親密的叫聲。

「信理真勇敢，恁有勇敢的爸母。」

我靠倚章伯的肩胛頭，閣大聲哮。

等我哮有一時仔，章姆仔閣細聲：

「有一个信理的朋友來揣阮，講信理有留一張批，交代伊親身交予妳。」

「信理的朋友叫做啥物名？」

「王輝民。」

「章姆仔，妳緊聯絡伊來台南。」

章姆仔限時專送予王輝民，隔工過晡仔，王輝民道到位，阮請伊入來坐，伊隨撏(jîm)信理的批㧣予我。

阿真：

鄭烈士偉大的精神喝醒我的良知，我無閣躊(tiû)
躇(tû)，決定追隨伊的跤跡，延續伊勇敢犧牲生命的精神。

阿俊神父有共我講過怹愛蚵蓮人的革命歷史，
1916年復活節的起義，康努利，五个起義領袖之一，
嘛是工會的領導者，佇起義的爭鬥中，伊受重傷，
英帝國殖民政府判伊死刑，伊徛袂起來，英軍硬共伊縛踮椅仔頂銃決。

這个殘忍事實流轉出來，愛蚵蓮人著驚，憤慨，痛罵殖民政府的惡毒，經過三冬，三冬！

1919年，天主教徒的愛蚵蓮人聯合基督教徒的愛蚵蓮人，發起愛蚵蓮人的獨立建國戰爭，
1922年，英軍撤退，愛蚵蓮人建立怹的自由政府。

妳知影，咱爸也泰源起義予殖民政府判死刑銃決，
七銃加一刀，七粒銃籽孔閣加一刀切斷血脈，已經經過較加二十冬啦，較加二十冬！