逗陣來唱囡仔歌Ⅴ：台灣俗諺篇

［推薦序］讀台灣詩，唱台灣歌／向陽
［推薦序］以歌解諺／陳益源
［自　序］唱比講的較好聽／康原

輯一‧台灣俗諺
牛牽到北京嘛是牛
一樣米飼百樣人
生的囥一邊，養的恩情較大天
惜花連盆，愛囝連孫
雙手抱囝兒，則知爸母時
兄弟仝心，烏塗變黃金
拍虎掠賊著親兄弟
牛牢內觸牛母
天頂是天公，人間是母舅王
在家日日好，出外朝朝難
叫豬叫狗毋值家己走
釣魚掠鳥，某囝餓死了了
一人一家代，公媽隨人拜
細漢偷挽匏，大漢偷牽牛
倖豬攑灶，倖囝不孝
囡仔人，有耳無喙
在家從父，出嫁從夫
在生無人認，死了一大陣
三代粒積，一代開空
起厝動千工，拆厝一陣風
無某無猴，穿衫破肩頭
魚趁生，人趁茈
好田地，毋值好子弟
娶著施黃許，敬如天公祖
仝攏彰化人，姓攏無相仝
毋通閹雞趁鳳飛
一个某，較贏三个天公祖
用伊的塗，糊伊的壁
一蕊好花插牛屎
翁生佮某旦，食飽好相看
二月二，土地公搬老戲
捾籃仔假燒金
做牛愛拖，做人愛磨
第一戇，插甘蔗予會社磅
教若會變，狗母攑葵扇
賣茶講茶芳，賣花講花紅
有錢食鮸，無錢免食
大樹蔭宅，老人蔭家
甘願做牛，免驚無犁通拖
位布店入去，對鹽館出來

輯二‧看樂譜唱囡仔歌

推薦序一

讀台灣詩，唱台灣歌
向陽

　　康原兄長年研究台灣諺語，著作誠濟，伊用咱日常誠捷使用的諺語做題材，通過囡仔歌的說唱，為咱展現出一个真趣味的俗諺世界，這本《逗陣來唱囡仔歌Ⅴ——台灣俗諺篇》就是伊多年拍拚的成果。佮前四本冊仝款，這本冊有俗語，有解說，嘛有歌詞，會通解說俗語的意思，閣會通唱出俗語的故事，會用講是一本欲了解台灣俗諺上蓋簡易利便的一本冊。俗諺是民間文學內底上重要的資產，伊反映民間社會的生活樣態，嘛充滿先人對應世事、自然、人生的智慧。咱台灣的俗語佮諺語千百種，佇咱的日常生活中嘛誠捷咧用。俗諺毋但是祖先的話，嘛是充滿文化內涵的語言。康原兄這系列的《逗陣來唱囡仔歌》的冊，過去已經出過動物歌、節慶歌、童玩歌佮植物歌等的主題，攏受著真濟讀者歡迎、呵咾，得著社會佮教育界的肯定。這本冊用俗諺來寫做囡仔歌，閣較靠近咱的日常，而且閣較活潑、趣味。是一本值得大人佮囡仔攏來欣賞、學習、傳唱的冊。

　　用囡仔歌來教台灣話，這是效果尚好的方式，康原兄對台灣文學、語言攏真有研究，嘛有誠好的成果，伊長久創作囡仔歌，嘛累積真濟經驗，這本冊亦有台灣兒童文學的價值。伊閣特別請作曲家張啟文來吟唱，展現出台灣話的氣口參聲調的美感，予這本冊閣較精采，用讀的、用吟的、用唱的，攏誠心適。

　　這是台灣的俗語，嘛是台灣人的心聲。請大家攏來讀台灣詩，唱台灣歌！

推薦序二

以歌解諺
陳益源

　　康原老師不愧是台灣文壇的點子王！他的這本新書精挑四十則台灣俗諺，以自編歌詞加以念誦，並由張啟文先生彈吉他演唱。這種「以歌解諺」的方式，十分罕見，創意十足。一般說來，成語典故慣用散文故事來解釋，康原老師這本書的「俗諺典故」和「字詞解釋」兩部分，便具有傳統俗諺故事集與俗諺詞典的性質；但他這部新作與眾不同的最大特點，即在於他自己編歌來對這四十則台灣俗語進行解釋並傳授聽者正確的用法，而成為四十首台灣俗語歌謠，這的確是一種別出心裁的新嘗試。

　　我個人曾與康原老師一起擔任《彰化縣民間文學集》的總編輯，我們在彰化許多鄉鎮進行過民間文學採集，採集的內容包括地方傳說故事、民間歌謠和俗語、諺語，其中俗諺所得不多，即使零星採錄到了，也不一定編入民間文學集，這可能又跟講述者自然使用而沒來得及深入解說有關。 

　　許多人能隨口講出俗語，但要認真解釋它的來歷的話，倒不一定可以說得明白透徹。康原老師這本新書，以歌配文，非常用心地對這四十則台灣俗語，一一進行了背景的說明和寓意的闡發，其中甚至融入了他父親的身世（〈生的囥一邊，養的恩情較大天〉），以及來自他的父母的﹁教示﹂（〈牛牢內觸牛母〉），既親切又生動。不過俗語來歷的追查其實難度頗高，例如：「囡仔人，有耳無喙」一語是否為台灣白色恐怖時期的產物？都可再考究。總之，「以歌解諺」是這回台灣文壇點子王康原老師的匠心獨運，此一創舉讓人在耳目一新之餘，也同時對於這樣新穎的俗語教學的成效，充滿著無限的期待。

自序

唱比講的較好聽
康原

　　台灣俗語是咱祖先留落來的語言，有時教示囡仔會講：「你真是牛，牽到北京嘛是牛。」就是講囡仔歹教示的意思，用牛來比喻固執。真濟人定講咱就是「台灣的牛」，戆戆做、袂反抗、真單純，個性變成「歹教、好騙、耳孔輕」，才會講「人講毋聽，鬼叫就行。」教囡仔有時會講：「囡仔人有耳無喙。」教咱的囡仔聽著大人咧講的話，會使聽袂使隨便閣傳出去，這就是台灣佇白色恐怖年代受著壓制，造成台灣人毋敢講話的原因。真濟話攏是咱祖先生活經驗所累積的人生箴言，字句雖然短短，但是句讀的意義確實真深。

　　用詩歌來教語言是真濟人的主張，阮定定講「唱比講的較好聽」，佇過去真濟種語言的學習，攏總透過唱歌來完成，學習的效果真好。阮出版過《逗陣來唱囡仔歌》系列的冊，分成動物歌、節慶歌、童玩歌、植物歌等主題來書寫，主要用來傳播台灣的歷史佮文化，得到真濟人的肯定；這回是用平常時定定聽著的俗語，每句俗語就用這首歌詞來解釋俗語的意思，唱出俗語彼當時的背景，抑是說明這句俗語的意思。

　　冊中嘛有民間傳說的改寫，像這首〈無某無猴，穿衫破肩頭〉：是描寫一個查埔人，牽家己的某去散步，看著一個走街仔仙變把戲，用耍猴戲來賺錢，伊著用家己的某去換彼隻猴，無想著返到厝以後，猴偷旋走無去，變成無某佮無猴，無某好照顧了後，所以穿衫會破肩頭，這款的代誌真是「痟貪軁雞籠」。所以講民間文學的俗語佮故事攏是咱創作的好素材。

　　有一些俗語是有地域hi̍k性的，像這首〈仝攏彰化人，姓攏無相仝〉：「鹿港施（死）了了，社頭蕭（痟）一半，大村賴（爛）賴趖sô，溪湖巫（霧）嗄嗄sà-sà，二林洪（紅）半天，福興粘（黏）一截，竹塘詹（針）一筒，仝攏是彰化人，若也攏姓無相仝。」這首歌主要說明彰化人姓氏分佈的情形，也可看出宗族聚落的形成；同時有一寡文字類似音，但是無仝字，親像：蕭（痟）、 賴（爛）、巫（霧）、 洪（紅） 、粘（黏）等，攏是接近的音，但是字佮意思無相仝。

　　俗語嘛會使解說人生道理、家庭倫理、勸世為善、鄉土慣習、社會百態、有啟示智慧的各種功能，過去的歌仔先，攑一支月琴唱著各種的勸世的歌；予阮想起台灣因為語言政策的錯誤，台灣俗語慢慢消失去，近年來阮定定出去演講，若講著俗語少年輩攏聽無伊的意思，所以阮想著用歌詞來說唱台灣俗語，並請做曲家張啟文吟唱佮用吉他來伴奏，用真準確tsún-khak的聲調唱出俗語的意思。

　　為著學習的方便，四十首歌有吟佮唱，每首歌詞由本人先唸一擺以後，由張啟文彈吉他佮說唱，希望唱出台灣人的心聲，冊中有CD的錄音佮簡譜，方便學語言的朋友，一方面學習俗語看歌譜，一方面吟唱歌詩了解俗語的意義，揣回強欲失傳的台灣俗語，是出這本冊上大的期待。